好呀，咁你就要多啲同我去食純素嘢

草食男同肉食女係一對來自香港嘅情侶。小蕉🍌係純素者，肉女🍗係個好中意食肉既人。

小蕉最近接受咗Meatless Movement 無肉更歡嘅訪問。佢覺得喺香港呢個環境下要做到純素真係幾難。出街食如果唔係去純素餐廳，基本上都無乜可能有口福。兩人有一晚凌晨突然心血來潮開咗一個 ig ，佢話一切真係超級即興，純粹係為咗分享純素嘢食，同埋一啲食肉得嚟有好食純素選擇嘅餐廳，希望各位可以同肉食朋友去食飯都可以有啖好食！

一切從心岀發
純素小蕉 🌱 🍌

請你自我介紹

大家好～我哋係 Veganana

我哋係一對嚟自香港嘅情侶，小蕉係純素，肉女係肉食者。因為成日唔知邊度有純素好嘢食，有一日忽發奇想，不如就開個 page 介紹下好食嘅純素嘢，等其他人都可以易啲揾到。

小蕉由2014年開始轉為蛋奶素食，好多人都會問我當時轉素嘅原因係咩，其實我自己都解釋唔到，因為我以前係無肉不歡嘅，但當時真係話轉就轉，亦都好好彩有屋企人嘅理解同支持，因為我都聽過好多轉素失敗嘅原因都係屋企人同朋友嘅阻礙，所以我諗最好嘅解釋就係緣份。

然後素食之後接觸得更多相關嘅資訊就發現其實蛋奶同好多動物相關嘅食品都係對動物嘅一種傷害，就喺兩三年前轉做純素。

素食係對自由民主同平等嘅肯定同支持
純素小蕉 🌱 🍌

因為我唔想背負住對其他生命嘅愧疚生存，每一啖肉或者每一樣同動物有關嘅產品，對我嚟講都係一次對生命嘅抹殺，我無資格，亦都承擔唔起。

素食係對自由民主同平等嘅肯定同支持，因為你相信每個生命都係生而平等，同樣有自由喺唔侵犯其他生命嘅權利之下照自己意願行事，至少我係噉諗。

唔好睇輕自己嘅一小步，你嘅改變唔單止對動物係一種支持，亦係對其他素食者嘅支持，世界會因你而改變，加油。
純素小蕉 🌱 🍌

身為素食者其實都會想令呢個態度影響到更多嘅人，不過素食實在係同現時主流嘅習慣南轅北轍，當大家由岀世開始就已經將動物當成食物嘅時候，實在係難以一時三刻轉為素食，幸好而家愈嚟愈多植物肉嘅岀現，令到大家嘅入門檻低咗，更易接受素食，亦都好感激有一班技術高超嘅廚師做岀一款又一款好好食嘅純素菜式，呢個亦都係我哋開呢個page嘅目的之一，就係想更多人接觸到呢啲岀神入化嘅純素，從而接受素食。

對於啱啱開始食素的你，一定要堅持信念同初心。可能有一部分人認為素食會令人快肚餓、無力、無精神、無營養、好清淡、淨係得菜可以食等等，不能盡錄。

我覺得最好嘅回應，就係我自己嘅存在，努力保持均衡嘅飲食，做多啲運動，做一個健康嘅素食者，勝過千言萬語嘅解釋。

素食其實唔等於健康，注意均衡健康飲食更加重要，例如蛋白質鐵質B12嘅攝取。無論食肉定食素，如果無注意營養噉食都係唔健康。我個人素食嘅目的，係想尊重返其他生命嘅保持健康嘅機會。

想喺度記錄同埋分享一下一啲我地食過，又比較特別啲既純素野食
純素小蕉 🌱 🍌

其實喺香港食過嘅好食嘅純素真係唔少，好感恩有一班有心又有力嘅創作者整岀咁高質嘅素食(;´༎ຶД༎ຶ`)：泰泰、V.W Vegan、一禪、一虎拉麵、404 Plant、The Cakery、Bien Caramélisé、DAMA⋯⋯等等等等，我諗過揀一兩間我最中意嘅，但我發現揀唔到，同埋唔係三言兩語講得完，想知有咩好食嘅，都係去follow我哋嘅page睇好啲。