希望我地可以令你對素食多左了解，甚至吸引到你嘗試，一齊茹下素啦

來自香港嘅呢一位素友已經以蛋奶素方式茹素左五年，半年前係機緣巧合下開展健身增肌之旅💪🏻。佢開始健身後，更重視食物品質，更想將好野些牙比朋友仔🤪 。自私食完，想同埋所有人分享，於是同朋友們一齊萌生左「3imple」。

佢最近咗無肉更歡嘅訪問, 介紹佢同朋友如何透過「3imple」，希望可以分享多啲啱心水嘅健康美食，亦都希望可以藉住呢個page分享多啲美食俾大家。

請你自我介紹

我係黎自香港嘅素食者，已經以蛋奶素方式茹素左大概五年。其實我由細到大都唔係好食肉，但都冇諗過要成為素食者。

去到有次上左堂動物權益堂，睇左好多相關紀錄片同埋資訊，個日見到啲肉都食唔落，自此之後就成為左一位素食者。

一開始屋企人好強烈反對，覺得茹素會唔夠營養，存在好多誤解。但經過左一段時間，佢地見我仲堅持緊，我間中又會分享下素食嘅好處，佢地開始接受素食。直到宜家，我地一家會一齊試素食餐廳，又會一齊煮素菜。見到佢地又抗拒到接受，我真係又感動又開心。

至於朋友，起初約出去食飯真係冇咩選擇，唔係羅漢齋就係磨菇意粉，久而久之佢地都小左約我出去。

吹啊吹讓素風吹~
@3imple

我知道素食唔係佢地想像中咁沉悶，於是開始將食過好食嘅po出黎同大家分享，一黎係紀錄生活，二黎係推廣素食，比其他人知道我都可以食得好豐富。有圖有真相~ 真係多左朋友約我去試新野，見到美食圖又會問下我係邊間餐廳。

逐漸地，朋友們都接觸多左素食。更令人開心嘅係最近多左好多素食餐廳，菜色多變又精緻，見到好多素食餐廳多人打卡，真係好令人鼓舞。因為身體力行，改變左身邊人對素食嘅刻板印象，於是更貪心地想開個帳號，同所有人分享素食嘅樂趣，所以有「3imple」。(係度趁機多謝兩位朋友，一直都好支持我，會陪我周圍食，仲會特登搵下有咩素好食。)

慢慢黎啦😛同我一樣，由每個禮拜一日開始
@3imple

無論係宗教﹑動物﹑健康定其他原因，都希望呢種素風可以持續落去，令更多人成為素食者。

對於想轉為素食嘅人，首先好欣賞你地嘅呢份心意。我會建議由一週一素開始，再慢慢加大個比例到一日一餐，最終成為素食者。

飲食模式嘅轉變，你嘅身體會有唔同嘅反應。可以多留意有咩好左，例如精神同皮膚狀態，令自己可以繼續堅持。有三樣野要注意︰

素食一般而言係健康嘅選擇，只係要小心唔好食咁多加工素肉同埋油炸物，如果唔係，即使茹素，你嘅身體都只會越黎越差；
坊間對素食仲存在好多誤解，要多閱讀相關文章，睇小啲內容農場，建立翻正確概念；
素食係個人選擇，千其唔好覺得素食就係高人一等，可以立於道德高地批評他人不是。

素食可以好簡單~ 我最中意嘅三道菜分別係傳統素叉燒，四喜烤麩同埋蕃茄炒蛋。

素叉燒做法比較簡單，主要係調味。食到叉燒醬，好似翻到細細個個陣，最簡單最純粹嘅味道。

四喜烤麩口感好豐富，木耳同各種菇令呢道菜更香更惹味。而且烤麩好高蛋白質，岩曬健身人士哈哈。最後蕃茄炒蛋就係家的味道，簡單易煮，亦最易食到。

其實素食者健身，同肉食者冇分別，都係一樣做負重訓練，一樣食夠蛋白質。不過植物蛋白質由於唔齊九種必須胺基酸，所以吸收率會比肉差啲。只要識配搭同埋份量食多啲，都係有效。我會一直堅持，用自己為例，消除更多人對素食嘅誤解，亦會令自己越黎越健康。

關於健身，最大感受就係「健康」。無論係精神上，定肉體上，我都明顯感覺到自己變好左。更容易集中精神，集中嘅時間都長左，小左覺得攰或者冇力。個人長期都暖笠笠，唔洗點著外套。呢種狀態係茹素後前所未有，要全面健康，我諗都真係要飲食加運動，相輔相成。一直堅持，除左係為自己，有部分係想比身邊嘅人知，素食係夠營養，都可以好fit。由於大家對素食未係好了解，行動比言語更有說服力，與其同佢地分享研究，同佢地分析數據，不如就比我自己佢地睇。由一開始「茹素冇營養」，到宜家身邊嘅人會問下我肌肉點練，其實真係好令人鼓舞。